Feijóo apela á pericia, ao compromiso e á competitividade do sector conserveiro e transformador para seguir deseñando o seu futuro Feijóo apela á pericia, ao compromiso e á competitividade do sector conserveiro e transformador para seguir deseñando o seu futuro
Vídeo coas palabras do presidente

Feijóo apela á pericia, ao compromiso e á competitividade do sector conserveiro e transformador para seguir deseñando o seu futuro

Reitera o compromiso da Xunta a través do Plan estratéxico da conserva que aposta pola orientación dos produtos de alta calidade cara aos mercados gourmet e pola busca de valor engadido para os subprodutos

Salienta que dentro do Plan estratéxico da conserva temos reservados 96 millóns para, ata 2020, seguir impulsando a industria conserveira galega

Lembra que Galicia é a primeira rexión de Europa e a segunda do mundo en produción de conservas de túnidos

Subliña que Galicia marcou en 2016 un novo récord na porción que representa da produción conserveira española: case o 87% do volume de produción e o 85% do valor de facturación proceden da Comunidade galega

Resalta que en 2016 o sector da conserva deu traballo a 12.000 persoas, un 5% máis que no 2015
 

Vigo, 11 de setembro de 2017.- O presidente do Goberno galego, Alberto Núñez Feijóo,
apelou á pericia, ao compromiso e á competitividade do sector atuneiro, conserveiro e transformador dos produtos do mar e das industrias auxiliares para seguir deseñando o seu futuro.

Durante a apertura da VIII Conferencia Mundial do Atún, Feijóo aseverou que, para avanzar por esta esixente ruta cara ao futuro, a Xunta seguirá comprometida co sector a través do Plan estratéxico da conserva. Un plan elaborado xunto á industria conserveira galega e que aposta pola orientación dos produtos de alta calidade cara aos mercados gourmet; pola busca de valor engadido para os subprodutos de pesca e os descartes, desenvolvendo e empregando técnicas de biotecnoloxía; e polo reforzo de promoción dos produtos da pesca, do marisqueo e da acuicultura, especialmente centrado nos máis novos.

Así mesmo, afirmou que o Goberno galego seguirá impulsando o crecemento do sector atuneiro e do marítimo-pesqueiro en xeral. “Desde 2009 estamos axudando a desenvolver 255 proxectos das nosas empresas, cun valor de 260 millóns de euros. E dentro do Plan estratéxico da conserva temos reservados 96 millóns para, ata 2020, seguir impulsando a industria conserveira galega”, engadiu.

Ao longo da súa intervención, o titular do Executivo autonómico valorou as cifras da industria conserveira española entre xaneiro e xuño deste ano, que consolidan o primeiro semestre deste 2017 como o mellor da última década a nivel de exportacións.
Ao respecto, destacou o feito de que o valor da produción exportadora crecese moito máis, un 82%, que o seu volume, que medrou un 25% con respecto a 2007.

Ademais de lembrar que Galicia é a primeira rexión de Europa e a segunda do mundo en produción de conservas de túnidos, Feijóo salientou que a nosa Autonomía marcou en 2016 un novo récord na porción que representa da produción conserveira española: case o 87% do volume de produción e o 85% do valor de facturación proceden da nosa Comunidade.

Este crecemento económico trae aparellada a creación de novos postos de traballo e unha mellora gradual da súa calidade e estabilidade. Non en van, en 2016 deu traballo a 12.000 persoas, un 5% máis que no 2015.

“En definitiva, a conserva galega ten un futuro brillante” aseverou, incidindo na necesidade de seguir apostando por un sector máis competitivo e máis sustentable. Neste camiño, o responsable do Goberno galego concluíu gabando o traballo de Anfaco-Cecopesca, unha organización que coordina e funciona como foro de reflexión para 245 empresas do complexo mar-industria.

Compártao :

Xunta de Galicia

Xunta de Galicia. Información mantida e publicada na internet pola Xunta de Galicia
Oficina de Rexistro e Información | Suxestións e queixas | Aviso legal | Atendémolo/a

Turgalicia