Feijóo subliña que a mostra sobre Antonio Quesada, na que colabora a Xunta, amosa o enorme potencial creativo de Galicia

Defende que a nosa Comunidade achegou o seu gran de area á cultura e ao patrimonio universal e continúa a facelo grazas ás novas xeracións de artistas

Vigo, 8 de febreiro de 2018.- O presidente da Xunta, Alberto Núñez Feijóo, destacou hoxe, na inauguración da exposición Antonio Quesada Porto. Dende o sentimento, o enorme potencial creativo da nosa Comunidade.

Neste sentido, salientou o talento dos artistas plásticos, músicos, escritores e actores galegos ao tempo que defendeu que a nosa Comunidade achegou o seu gran de area á cultura e ao patrimonio universal e continúa a facelo na actualidade grazas ás novas xeracións de artistas.

Estes, sinalou, estudan e inspíranse en artistas como Antonio Quesada, un artista capaz de capturar a esencia secreta da paisaxe. “Antonio Quesada atopou na paisaxe a liberdade que non encontrou noutros xéneros, converténdose nun dos paisaxistas máis importantes polo seu estilo suxestivo e inconfundible”, subliñou.

Ao fío disto, o titular do Executivo galego salientou o talento, a tenacidade e a capacidade de traballo que caracterizaban a este artista autodidacta, atributos que, indicou, comparte o pobo galego.

Así mesmo, mostrouse convencido de que os 32 óleos que conforman esta exposición –cedidos pola propia familia do autor e por outras entidades– animarán a todos os visitantes a viaxar a novos mundos e, sobre todo, a descubrir a particular mirada deste galego universal, cuxa forma de representar a paisaxe traspasou as nosas fronteiras para chegar a numerosas cidades de Europa e mesmo dos Estados Unidos.

Para rematar, o presidente da Xunta recordou o compromiso do Goberno galego coa arte. Así, a Consellería de Cultura, Educación e Ordenación Universitaria destinou un total de 4.000 euros ao proxecto expositivo sobre Antonio Quesada.
 

Compártao :

Xunta de Galicia

Xunta de Galicia. Información mantida e publicada na internet pola Xunta de Galicia
Oficina de Rexistro e Información | Suxestións e queixas | Aviso legal | Atendémolo/a

Turgalicia