PALABRAS DE ALBERTO NÚÑEZ FEIJÓO NA SÚA TOMA DE POSESIÓN COMO PRESIDENTE DA XUNTA DE GALICIA

Santiago, 12 de novembro de 2016.-


Señor Presidente do Goberno de España,
Señor Presidente do Parlamento,
Autoridades presentes,
Miñas donas e meus señores:


Por terceira vez teño a honra de recibir a investidura como presidente da Xunta de Galicia.

Por terceira vez o pobo galego e o Parlamento outórganme a responsabilidade de dirixir o Goberno do noso país, de acordo coa Constitución e o Estatuto de Autonomía.

Por terceira vez síntome como un discípulo da nosa xente.

Igual que unha boa nai, Galicia non deixa de ensinar leccións e experiencias acumuladas durante a súa longa andaina pola historia.

Espero seguir sendo un fillo que a escoita, aprende, e lle devolve cando menos unha parte do moito que Galicia me deu.

Se a estas alturas do século XXI nos preguntamos por un pobo que administrou con proveito e sensatez o seu autogoberno, teriamos que contestar que ese pobo é Galicia.

Se queremos atopar un modelo de orgullo comunitario que non exclúe, senón que incorpora outras culturas e identidades, ese modelo está en Galicia.

Se imos na procura dun pobo diverso que mantén a súa unidade e supera con ela os malos momentos, atoparémolo en Galicia.

Se precisamos un exemplo de país onde nacen as máis vellas tradicións espirituais europeas, pero que ten unha sociedade aberta e unha economía internacionalizada, ese exemplo chámase Galicia.

E se buscamos estabilidade, esa estabilidade haberaa en Galicia.
Galicia cre en si mesma. Os galegos protagonizamos unha epopea democrática que ten como resultado unha sociedade máis libre, máis igual e máis fraterna, sen ter que pagar o tributo do enfrontamento ou a discordia.

O autor desa partitura foi o pobo galego e os intérpretes, gobernantes de todos os pensamentos que xa teñen un lugar de privilexio na nosa historia.

Os presidentes Xerardo Fernández Albor, Fernando González Laxe, Manuel Fraga e Emilio Pérez Touriño fan que calquera galego sinta un lexítimo orgullo. Traballaron a prol dunha Galicia unida por infraestruturas, por servizos públicos homoxéneos, e tamén por valores compartidos. Agradézolle a súa presenza hoxe aquí, ao igual que a de presidentes de Deputacións e a de rexedores e ex rexedores que son tamén partícipes da construción desa Galicia única, e dunha forma tamén moi especial á voceira e aos voceiros dos Grupos Parlamentarios da Cámara.

Entre todos demostramos a inxustiza de tópicos que parecían endémicos. A suposta terra do minifundio é escenario de grandes proxectos colectivos no político, no social, no cultural e no económico.

A sociedade descrita como titubeante e ambigua, reafirma con democrática teima unha estabilidade baseada en maiorías elocuentes.

Galicia sabe o que quere. Responde a esa idea de país no que as persoas non viven simplemente xuntas, senón que fan cousas xuntas.

Formamos parte deses pobos que non se preguntan que lles vai pasar no futuro, senón que van facer no futuro. Antes de que este Parlamento que nos acolle fose unha realidade, formou parte dos soños de moitos dos nosos pais, avós e devanceiros.

O autogoberno foi unha utopía realizada grazas á loita e o traballo de galegos coñecidos e anónimos. Agora o soño realizable é que o futuro sexa un tempo no que Galicia brille como unha comunidade libre e próspera. O futuro non pode sorprendernos e, moito menos, dividirnos.

Para iso, a estabilidade política e institucional é un requisito esencial. Estabilidade do autogoberno galego, e estabilidade tamén da nación española da que Galicia forma parte, e da Unión Europea á que nos vencellan pasados, valores e obxectivos comúns.

O equilibrio político que os galegos teñen acadado é efectivamente unha excepción en España pero non unha anomalía. O anómalo é o bloqueo institucional, o establecemento de liñas vermellas arbitrarias ou a insistencia en prexuízos que prexudican a gobernación do Estado.
Sabe o presidente Mariano Rajoy, ao que lle quero agradecer o seu xesto de participar nesta toma de posesión, que Galicia pode e quere ser un modelo de estabilidade para España.

E pídolle que lle traslade ao Xefe do Estado que son moi consciente de que o que acabo de prometer supón asumir a honra de ser o Presidente de Galicia pero tamén o representante ordinario do Estado na miña terra, e fágoo con orgullo e co permanente compromiso de lealdade a España.

Sabe tamén que o Goberno que eu presida será un aliado fiel e coherente para afrontar os retos que nos agardan.

Galicia situarase a carón das reformas económicas que consoliden a recuperación e permitan que chegue aos que máis sofren, tanto polo desemprego como por un traballo que non lles dá recursos suficientes.

Como nacionalidade histórica que somos, Galicia non estará ausente de ningún debate territorial que cuestione a soberanía común ou un financiamento xusto para todos os cidadáns de todas as comunidades autónomas que conformamos España.

Como berce xacobeo da nova Europa, Galicia anhela un novo pulo da Unión Europea que disipe os malos augurios.

Galicia estará presente no futuro con esa estabilidade, e tamén perseverando nunha Galicia global de portas e fiestras abertas, e pontes tendidas.

A Galicia do século XXI non pecha nin desconecta, nin rexeita. É o pobo do SI, o pobo afirmativo, unha comunidade onde non existen <verdades como puños>, senón verdades como mans tendidas.

Esa Galicia entende que o poder máis efectivo dun país está nas súas redes de cooperación, na súa capacidade para comunicarse coa súa contorna e rexeitar calquera illamento.

O futuro, señoras e señores, tampouco nos pode dividir. Defendemos un crecemento harmónico que se asemelle ao dos organismos vivos, no que non haxa galegos nin Galicias que queden atrás.

A nosa fortaleza está e seguirá estando na inexistencia de brechas que fragmenten a sociedade.

Avanzaremos todos, co acordo de todos e cara a metas definidas por todos os que sigamos o consello de unir esforzos e non de dividilos, tal e como sempre nos reclaman os galegos.
Señoras e señores. Acontecementos ben recentes veñen demostrar que o mañá é azaroso, e que a profesión de futurólogo ten pouco futuro. Pero no medio das incertezas permanece en pé a seguridade de que a unidade colectiva e a estabilidade institucional, son unha garantía para converter ese futuro en aliado.

Os galegos sábeno. Os galegos sabémolo. É unha lección que se transmitiu de xeración en xeración dende tempos afastados, e que agora chega a nós para que a apliquemos.

Síntome discípulo da nosa xente. Síntome como un escolante que vai coa mente aberta e o corazón ilusionado á aula do mestre, como se se tratara do primeiro día e da primeira clase.

Ben sei que esa sabedoría que Galicia atesoura non está ao meu alcance, pero sempre necesitarei acudir a ela para orientarme e servir mellor aos meus concidadáns.

Oxalá que me ilumine e anime na tarefa de empezar a vivir no futuro. Galicia é un dos pobos máis antigos do mundo porque así o quixeron os nosos devanceiros. Galicia, unha terra, un pobo, unha fala... e un Parlamento. A nosa misión é facer desde aquí que perdure e que, no noso soar, <o goberno do pobo, polo pobo e para o pobo, xamais morra>.

Conto para iso coa lembranza e o exemplo dun galego que non está.

E tamén conto coa motivación e coa ilusión dun galego que está por vir.

Señor presidente do Goberno de España. Galicia sempre estará aí. Nunca pedirá máis do que lle corresponde, pero nunca se conformará con menos do que lle corresponde.

Moitas grazas.

Compártao :

Xunta de Galicia

Xunta de Galicia. Información mantida e publicada na internet pola Xunta de Galicia
Oficina de Rexistro e Información | Suxestións e queixas | Aviso legal | Atendémolo/a

Turgalicia