Feijóo constata que o sector vitivinícola galego goza de boa saúde e ten forza para afrontar os retos do futuro

As axudas ao Consello Regulador do Ribeiro superaron o pasado ano os 400.000 euros

As cinco denominacións de orixe vitivinícolas de Galicia incrementaron as súas vendas un 7,5 % na campaña 2016-2017
 

Ribadavia (Ourense), 10 de xuño de 2018.- O titular do Goberno galego, Alberto Núñez Feijóo, constatou hoxe na celebración do 50 aniversario das adegas Viña Costeira que o sector vitivinícola galego goza de boa saúde e ten forza para afrontar os retos do futuro.

Proba disto é que as cinco denominacións de orixe de viño galegas (Monterrei, Rías Baixas, Ribeira Sacra, Ribeiro e Valdeorras) incrementaron as súas vendas un 7,5% na campaña 2016-2017. En concreto, esta porcentaxe sitúa á Comunidade galega tres puntos por riba da media española de crecemento, que se situou no 4,4%.

Estes datos son produto do traballo de adegas como Viña Costeira, que pertence á Denominación de Orixe do Ribeiro, a máis antiga de Galicia, e acaba de dar o salto a outra de gran importancia: a de Valdeorras. “Viña Costeira cumpre 50 anos, medio século recuperando a tradición vitivinícola desta terra, pero tamén modernizándoa”, subliñou o presidente da Xunta.

A continuación, Feijóo gabou o traballo desta empresa por combinar tradición e modernización e, ao mesmo tempo, xerar prosperidade na súa contorna. Nesta tarefa, afirmou, Viña Costeira seguirá contando co apoio da Consellería do Medio Rural. De feito, recordou que as axudas ao Consello Regulador do Ribeiro superaron o pasado ano os 400.000 euros.
 

Compártao :

Xunta de Galicia

Xunta de Galicia. Información mantida e publicada na internet pola Xunta de Galicia
Oficina de Rexistro e Información | Suxestións e queixas | Aviso legal | Atendémolo/a

Turgalicia