Feijóo resalta o compromiso de Galicia e Asturias para converter o rural "nun punto de destino" para os mozos con oportunidades económicas, axudas á demografía e boas comunicacións

Incide no compromiso da Xunta de apoiar e acompañar todas as iniciativas que se impulsen no rural en eidos como o turismo, a alimentación, o forestal ou en sectores emerxentes como o polo aeronáutico

Recalca que o estilo de vida no rural nada ten que ver cun modo antigo de fai décadas, e alude á necesidade dun marketing rural que dea visibilidade á transformación que, pouco a pouco, está a vivir

Reitera que o futuro do rural está ligado tamén, dun xeito indiscutible, coa demografía; unha cuestión que precisa, di, da implicación do conxunto de España e do conxunto de Europa

Insiste na importancia que tivo e está a ter o sistema autonómico na revalorización do rural, dando visibilidade a problemas que carecían de altofalantes institucionais

Subliña a utilidade da alianza autonómica entre Asturias e Galicia para perseguir o respecto á igualdade entre os españois, dentro dunha España equilibrada que se axuste ás peculiaridades territoriais, sen dobregarse ante os privilexios

Castropol (Asturias), 4 de xullo de 2019.- O presidente do Goberno galego, Alberto Núñez Feijóo, resaltou hoxe o compromiso de Galicia e Asturias para que o rural non sexa simplemente un punto de partida, senón tamén “un punto de destino” para os mozos, con oportunidades económicas, axudas ao impulso demográfico e boas comunicacións. “Temos que conseguir que os mozos queiran vivir no rural porque poidan vivir do rural”, aseverou, durante a conferencia que pronunciou, esta tarde, dentro do Foro Presente e futuro do medio rural en España.

Para acadar este obxectivo, subliñou que Galicia fixo unha aposta sen precedentes no plano fiscal, de xeito que, hoxe, hai un programa de impostos cero para todo aquel que queira comprar ou permutar unha finca para executar un proxecto económico. E baixáronse notablemente os impostos á vivenda para as familias máis novas no rural.

Igualmente, estanse a dar pasos adiante para agrupar as terras, de xeito que, nos últimos dez anos, 34.000 propietarios beneficiáronse das concentracións parcelarias; ademais de estar prevista unha Lei de recuperación e posta en valor da terra agraria de Galicia.

Máis aló de todas estas facilidades, o titular da Xunta incidiu no compromiso do Executivo galego de apoiar e acompañar todas as iniciativas que se impulsen no rural. Así, no eido do turismo, referiuse á posta en marcha dunha liña de axudas para aquelas persoas que queiran montar un negocio turístico no rural, ou ao gran impacto que nos concellos máis pequenos terá a celebración do Xacobeo 2021.

En relación ao sector agroalimentario, aseverou que, nun momento no que cada vez son máis as persoas que valoran a alimentación saudable, os produtos galegos son sinónimo de calidade. “E o noso obxectivo é que cada vez a nosa terra sexa máis Galicia Calidade”, abundou.

Así mesmo, subliñou o interese dos emprendedores polo sector lácteo, reflectido en proxectos de transformación moi potentes con capacidade para absorber o leite que se produce na comunidade galega. E, no eido forestal, fixo fincapé nos pasos que se están a dar para fortalecer un sector cun gran potencial, ademais de salientar a aposta por sectores emerxentes como a creación dun polo aeronáutico situado en Lugo, unha das dúas provincias máis rurais de Galicia.

Divulgar a transformación que, pouco a pouco, está a vivir o rural

Ao longo da súa intervención, Feijóo aludiu tamén á necesidade de dar visibilidade ao mundo rural, á necesidade de divulgar a transformación que, pouco a pouco, está a vivir.

“Debe saberse que o rural se está reactivando con estímulos a mozos emprendedores que desexan facerse cargo da explotación dun gandeiro que se xubila, creando unha industria de transformación de produtos agrícolas ou incluso iniciando proxectos empresariais afastados do que tradicionalmente se asocia co rural”, dixo, insistindo na necesidade dun marketing rural.

“A España rural, a Asturias e a Galicia rurais son un posible destino para o emprendedor e todo aquel cun proxecto de vida audaz”, recalcou, resaltando que na comunidade galega: máis de 7.000 gandeiros facturan anualmente 800 millóns de euros; 80.000 familias están vinculadas a unha silvicultura que xera 300 millóns; o pescado e marisco facturan 500 millóns; e máis de 3.000 mozos incorporáronse ao rural.

Logo de referirse ao crecemento progresivo da agricultura ecolóxica ou da Tenreira Galega, o presidente da Xunta recalcou que o estilo de vida no rural nada ten que ver cun modo antigo de fai décadas.

A demografía, unha cuestión que precisa da implicación de España e de Europa

O futuro do rural está ligado tamén para Feijóo, dun xeito indiscutible, coa demografía; unha cuestión que precisa, dixo, da implicación do conxunto de España e do conxunto de Europa.

Ao respecto, explicou que a política demográfica da Comunidade que preside baséase en proporcionar os máximos apoios e máximas facilidades ás familias que deciden ter fillos: máis flexibilidade horaria, baixas de maternidade e paternidade de maior duración e máis recursos para a conciliación. “E somos a primeira Comunidade que aprobou unha Lei de impulso demográfico, que busca trasladar a todos os cidadáns a idea de que os fillos agora nacen con ferramentas legais e administrativas de axuda e protección”, engadiu.

Feijóo destacou ademais o importante esforzo que se fixo nos últimos anos para lograr que o desenvolvemento urbanístico se fixese de forma máis razoable, co obxectivo de converter o rural nun lugar idóneo para vivir, traballar e producir. E, ao respecto, destacou o corpo normativo amplo co que conta a Comunidade, desde o punto de vista do urbanismo e tamén da paisaxe, así como a aposta por figuras como a asociación de concellos.

Sobre as comunicacións virtuais e convencionais, afirmou que grazas ao investimento dos últimos anos, a banda larga chega ao 100% dos galegos. “E hoxe o rural está ben comunicado desde o punto de vista ortodoxo: con vías de alta capacidade a menos de 15 minutos para a inmensa maioría dos galegos; temos un AVE en toda a franxa atlántica e esperamos que se complete o AVE á Meseta; e deseñamos un sistema de transporte a demanda no rural, para que calquera galego poida desprazarse en transporte público cando o precise”, matizou.

A importancia do sistema autonómico na revalorización do rural

Na segunda parte da súa conferencia, o responsable do Goberno galego fixo fincapé na importancia que tivo e está a ter o sistema autonómico na revalorización do rural. Non en van, asegurou que unha das razóns para seguir proclamando o noso autonomismo é precisamente que as autonomías permitiron dar visibilidade a problemas que carecían de altofalantes institucionais como son os do mundo do rural.

Neste sentido, subliñou a utilidade da alianza autonómica entre Asturias e Galicia para identificar intereses comúns e establecer estratexias comúns. “E esa alianza asturiano-galaica ten ademais unha virtude que se bota en falta noutros plantexamentos autonómicos: non se fai contra ninguén, senón que persegue algo tan simple e ao tempo tan transcendental como o respecto á igualdade entre os españois, dentro dunha España equilibrada que se axuste ás peculiaridades territoriais, sen dobregarse ante os privilexios”.

Feijóo concluíu avogando por distinguir as políticas que incumben á nación, e que requiren diálogo entre os grandes partidos democráticos, doutras que poden ser obxecto de transacción nunha negociación menor. “E unha desas políticas medulares tería que afectar á España rural”, rematou.

Xunta de Galicia

Xunta de Galicia. Información mantida e publicada na internet pola Xunta de Galicia
Atención á cidadania | Accesibilidade | Aviso legal | Mapa do portal

Turgalicia