A hospitalización a domicilio incluirá atención compartida de primaria e especializada, con visitas conxuntas cando sexa necesario A hospitalización a domicilio incluirá atención compartida de primaria e especializada, con visitas conxuntas cando sexa necesario
Vídeo da intervención do presidente

A hospitalización a domicilio incluirá atención compartida de primaria e especializada, con visitas conxuntas cando sexa necesario

Feijóo destaca que o plan, inicialmente previsto co horizonte de 2023, finalmente terá como eixo temporal o 2019-2021

Resalta que os equipos pasarán de 45 a 60, isto é, un aumento do 33%

Santiago de Compostela, 16 de xullo de 2019.- O presidente do Goberno galego, Alberto Núñez Feijóo, destacou hoxe que o Plan de Hospitalización a Domicilio reforzará o vínculo deste modelo asistencial coa Atención Primaria, xa que incluirá a atención compartida de primaria e dos profesionais de HADO. Así, asistirán ao paciente de maneira coordinada, programando visitas conxuntas cando sexa necesario.

Nesta mesma liña, precisou que este reforzo do vínculo coa Atención Primaria implicará protocolizar este asunto polo que se establecerán circuítos de derivación normalizados e protocolizados entre atención primaria e hospitalización a domicilio e, tamén, entre residencias e hospitalización a domicilio. Ademais, deséñanse e adáptanse ferramentas electrónicas para facer posible esta derivación desde a historia clínica, así como para que os médicos e persoal de enfermaría de Atención Primaria poidan realizar consultas aos profesionais de HADO.

No acto de presentación do novo plan destacou, ademais, que se acurtarán os prazos marcados nun principio e as melloras se integrarán no horizonte temporal 2019-2021. E incidiu en que a Hospitalización a Domicilio terá un papel fundamental para afrontar desafíos como o envellecemento da poboación e a súa dispersión, así como as enfermidades crónicas. Non en van, aseverou que, de non existir este servizo as persoas que se benefician del terían que estar hospitalizadas, recordando ademais as vantaxes que ofrece como a redución das complicacións relacionadas coa asistencia sanitaria e a comodidade para as familias que, por exemplo, evitan desprazamentos ao hospital.

O presidente da Xunta incidiu en que o novo Plan apostará pola equidade, xa que permitirá estender o servizo ao 100% dos galegos, os 365 días do ano. Para logralo, contará cun orzamento de 2,5 millóns de euros, dos cales 2,3 se destinarán a persoal.

Este plan implicará que os equipos pasen de 45 a 60, isto é, un 33%; e a dotación de recursos humanos aumentará en 45 profesionais –15 médicos e 30 profesionais de enfermaría-. O resto do orzamento, lembrou, irá destinado a equipamento sanitario e para aumentar a flota con 15 novos vehículos.

O presidente da Xunta concluíu lembrando que a Sanidade Pública é unha prioridade para todos os galegos, “é así para os profesionais que fan que todo funcione, e é así para o Goberno galego, pois á Sanidade destinamos o 40% do orzamento”.

Xunta de Galicia

Xunta de Galicia. Información mantida e publicada na internet pola Xunta de Galicia
Atención á cidadania | Accesibilidade | Aviso legal | Mapa do portal

Turgalicia