Feijóo salienta que o novo curso escolar comeza con máis plurilingüismo, con máis libros dixitais e ofrecendo máis servizos públicos Feijóo salienta que o novo curso escolar comeza con máis plurilingüismo, con máis libros dixitais e ofrecendo máis servizos públicos
Vídeo das palabras do presidente da Xunta no CPI Terras de Maside

Feijóo salienta que o novo curso escolar comeza con máis plurilingüismo, con máis libros dixitais e ofrecendo máis servizos públicos

Destaca que a xornada comezou “con tranquilidade” e felicita a todos os membros da comunidade educativa “por conseguilo e aos pais e nais por confiar ao Sistema educativo galego o futuro dos seus fillos”

Subliña que este curso contará con máis 600 centros educativos con modelo plurilingüe, implantados en menos dunha década, e cun total de 617 auxiliares de conversa, o que supón multiplicar case por 10 o número que había no curso 2008/09

Salienta os últimos datos da OCDE que acreditan que Galicia, en relación ao abandono escolar, sitúase por debaixo da media da OCDE e da media de España

Resalta que este curso comeza con 50 centros reformados, logo dun investimento total nestes tres meses de verán de máis de 50 millóns de euros

Maside (Ourense), 11 de setembro de 2019.- O presidente da Xunta destacou hoxe que o novo curso escolar 2019/2020 comeza con “máis plurilingüismo, con máis libros dixitais e ofrecendo máis servizos públicos”, aseverou, referíndose ao incremento de prazas en comedores escolares, ao servizo de transporte escolar e ao incremento nun 30% do número de centros con libros dixitais, entre outros.

Durante unha visita xunto á conselleira de Educación, Universidade e Formación Profesional, Carmen Pomar, ao CPI Terras de Maside, Feijóo subliñou que a xornada comezou “con tranquilidade” e quixo felicitar a todos os membros da comunidade educativa “por conseguilo e aos pais e nais por confiar ao Sistema educativo galego o futuro dos seus fillos”.

Máis polo miúdo, o presidente da Xunta precisou que este curso, que arrinca para preto de 197.000 alumnos de educación especial, infantil e primaria, contará con máis 600 centros educativos con modelo plurilingüe en toda a comunidade, implantados en menos dunha década: 423 centros educativos serán plurilingües -38 máis que o curso pasado-; 171 contarán con Estrela PluriInfantil -29 máis que o ano anterior-, e 13 con Estrela PluriBach -5 máis que no curso 2018/2019-.

Así mesmo, neste curso funcionarán nos centros un total de 4.647 seccións bilingües, o que significa multiplicar por 6,5 as que había no curso 2008/09, beneficiando a preto de 110.000 alumnos. E a meirande parte deles contarán co apoio dun auxiliar de conversa nativo na lingua correspondente. Non en van, prestarán este servizo un total de 617 persoas, o que supón multiplicar case por 10 o número de auxiliares que había no curso 2008/09.

Por outra banda, no curso 2019/2020, un total de 70 ciclos de Formación Profesional impartirán parte do seu currículo nunha lingua estranxeira, unha modalidade tamén implantada polo actual Goberno da Xunta de Galicia.

Con estes datos, a comunidade achégase de modo significativo aos obxectivos marcados pola Estratexia galega de linguas estranxeiras 2020, EDUlingüe, cuxa finalidade fundamental é estender o plurilingüismo a todas as etapas educativas e facilitar que os alumnos poidan acreditar o seu nivel de lingua estranxeira ao final de etapa. Ata hai tres cursos, a ensinanza plurilingüe estaba implantada nas etapas obrigatorias, é dicir, Primaria e Secundaria, pero desde o curso 2017/18 ábrese tamén a Infantil, Bacharelato e Formación Profesional.

Hoxe comezaron tamén a funcionar con total normalidade os servizos de transporte e os de comedor xestionados pola Consellería. O número de prazas de comedor escolar en toda Galicia será de 76.987, das cales 14.890 serán xestionadas por ANPAS ou concellos. No que atinxe ao transporte, prestarase servizo –segundo as estimacións provisionais- a 88.054 alumnos de 776 centros públicos.

Diante destas cifras, Feijóo destacou os últimos datos da OCDE que acreditan que a Comunidade galega, en relación ao abandono escolar sitúase por debaixo da media da OCDE e da media de España.

Un comezo de curso con centros reformados

O presidente do Goberno galego concluíu subliñando que este curso comeza con 50 centros reformados, logo dun investimento total nestes tres meses de verán de máis de 50 millóns de euros destinados a grandes obras -obra nova, rehabilitacións enerxéticas, integrais e obras de calado-.

Así, en relación ao CPI Terras de Maside, destacou que a Administración autonómica vén de executar unha obra de rehabilitación enerxética por importe de preto de 500.000 euros, na que se levaron a cabo actuacións como: a colocación de illamento nas fachadas a través da inxección de illante en cámara, a colocación de lá de roca sobre forxado de baixo cuberta, e a substitución de toda a carpintería exterior e a de parte das luminarias existentes por equipos de alta eficiencia con equipos de regulación e detectores de movemento.

Ademais da colocación de fiestras de dobre vidro con rotura de ponte térmica e de novas caixas de persianas con illamento térmico, mudouse a cuberta dos patios interiores por unha nova de panel sándwich e substituíuse o falso teito de todo o edificio principal, salvo en espazos renovados recentemente como a aula bidueiro, a biblioteca infantil ou a aula de tecnoloxía e o cibersalón.

A actuación incluíu, así mesmo, o cambio de canlóns e baixantes do edificio principal, traballos puntuais na instalación de fontanería e de calefacción para permitir un aforro enerxético de máis do 20%. Por outra banda repasáronse e pintáronse parte dos paramentos interiores, elementos metálicos e de madeira.

Xunta de Galicia

Xunta de Galicia. Información mantida e publicada na internet pola Xunta de Galicia
Atención á cidadania | Accesibilidade | Aviso legal | Mapa do portal

Turgalicia