A Xunta recoñece ao Consello de Europa como Embaixador do Camiño de Santiago pola súa labor de difusión, promoción e coñecemento da Ruta Xacobea

Destaca que a institución favoreceu o coñecemento e divulgación da ruta, converténdoa en primeiro itinerario Cultural Europeo en 1987 e promocionou os valores xacobeos como unha herdanza común europea

Salienta que cada vez son máis os peregrinos que percorren os distintos Camiños coa previsión de rematar o ano con preto de 350.000 peregrinos
 

Santiago de Compostela, 24 de outubro de 2019.- O presidente do Goberno galego, Alberto Núñez Feijóo, informou hoxe, na rolda de prensa do Consello, do recoñecemento como Embaixador do Camiño ao Consello de Europa, unha figura que, tal e como recordou, foi creada en 2013 para distinguir o labor de persoas e institucións que contribuíran ao coñecemento e divulgación da ruta e dos seus valores.

No caso do Consello de Europa polo seu papel clave na difusión, promoción e coñecemento da Ruta Xacobea e dos valores asociados á mesma. De feito, dixo, a institución favoreceu o coñecemento e divulgación da ruta, foi o artífice da súa declaración como primeiro itinerario Cultural Europeo en 1987 e ademais promocionou os valores xacobeos como unha herdanza común europea.

A continuación, e logo de precisar que son as institucións e as persoas as que verdadeiramente manteñen a vixencia do Camiño, Feijóo subliñou que cada vez son máis os peregrinos que percorren os distintos Camiños de Santiago. Tanto é así, subliñou, que os últimos datos sitúan nos 328.892 o número de peregrinos que chegaron a Compostela este ano, superando a cifra de todo o 2018 e coa previsión de rematar o ano con ao redor de 350.000 peregrinos “nas mellores condicións históricas e con optimismo de cara ao Xacobeo 2021”, engadiu.
 

Xunta de Galicia

Xunta de Galicia. Información mantida e publicada na internet pola Xunta de Galicia
Atención á cidadania | Accesibilidade | Aviso legal | Mapa do portal

Turgalicia