Declaracións do presidente da Xunta

Feijóo avanza un paquete de medidas por case 5 millóns de euros para apoiar ao sector do ocio nocturno ante a pandemia

Incide en que o obxectivo é paliar a baixada absoluta, ingresos cero, de todo este sector económico que supón unha parte importante en empregos na Comunidade

Santiago de Compostela, 15 de outubro de 2020.- O presidente da Xunta, Alberto Núñez Feijóo, anunciou hoxe, na rolda de prensa do Consello, un paquete de medidas por case 5 millóns de euros para apoiar ao sector do ocio nocturno ante a pandemia.

En primeiro lugar, Feijóo referiuse á convocatoria dunha liña de axudas por valor de 2,2 millóns de euros, para sufragar os gastos de alugueiro dos establecementos que se atopen pechados desde o 15 de agosto como consecuencia da decisión tomada polo Ministerio de Sanidade, en coordinación coas comunidades autónomas. Así mesmo, o contrato de aluguer terá que estar en vigor desde o mes de xaneiro de 2020 e seguir vixente durante o ano posterior á data en que se permita a reapertura.

En segundo lugar, o responsable do Executivo galego destacou a convocatoria de axudas por 600.000 euros para os establecementos habilitados como sala de concertos, sala de espectáculo ou café concerto, que o pasado 2019 levasen a cabo un mínimo de 15 concertos.

O importe do proxecto presentado deberá ser superior os 25.000 euros e subvencionarase ata o 80% dos gastos e “facemos un anticipo de forma inmediata, anticipo que poden utilizar no momento en que se reabra o ocio nocturno”, precisou o presidente da Xunta.

Ademais, habilitarase unha liña de axudas para o mantemento do emprego neste sector por 2 millóns de euros, e á que se sumarán nas vindeiras semanas outras iniciativas para facer fronte á covid.

Feijóo tamén explicou que a cuarta medida deste paquete “son préstamos para o financiamento do capital de explotación a un tipo de interese do 0,2 con tres anos de carencia”.

Para concluír o presidente da Xunta incidiu en que o obxectivo é “paliar a baixada absoluta, ingresos cero, de todo este sector económico de ocio que supón, sen ningunha dúbida, unha parte importante en empregos na Comunidade autónoma”.

Xunta de Galicia

Xunta de Galicia. Información mantida e publicada na internet pola Xunta de Galicia
Atención á cidadania | Accesibilidade | Aviso legal | Mapa do portal

Turgalicia